Address for CSSP Freshmen Survival Handbook
Huminga ng malalim
Namnamin, naiibang simoy ng hangin
Na malayang umiihip sa Diliman
Pangarap, inasam-asam, narito na ang kagampanan.
Laging makakasama,
Amoy ng mga pauli-ulit na ulam sa CASAA,
Monay,camote-Q, turon, at carioca
Malalanghap, usok ng IKOT at TOKI jeep
Kahalo ng mga hininga
Ng sa paglakad at pagtakbo sa Academic Oval,
Kalusuga’t pagpayat iniaasa.
Pagmasdan ang luntiang kapaligiran,
Matatayog na mga gusali, bago at luma
Tandaan mabuti ang mga bagong mukha
Abangan, mga palabas sa teatro at lansangan
Imulat ang mga mata sa lantad na katotohanan
Dito tayo sa UP, nirerespeto ang kaibhan.
Pakinggan nang mabuti
Tunog ng kampanang umaawit, halakhak sa mga tambayan
Mga sigaw ng protesta, mga bulungan ng nag-iibigan
Mga boses na gagabay sa inyong mga unang hakbang
Mga tuntunin at payo, huwag kalimutan
Mga balita ng mga guro at kolehiyo,inyong abangan.
Yakapin ang mga karanasan
Hatid ng inyong pagbaybay sa di-patag na daan
Matuto mula sa mga kamalian
Ipagbunyi ang mga suliraning pagtatagumpayan!
Pagbating mainit aming alay
Pangakong maingat na pagsubaybay
Habang hinuhubog, inyong mga diwa’t isipan
Upang maisapuso, paglilingkod sa Sangkatauhan
Kayong hinirang na mga bagong Iskolar ng Bayan!
